კოლექციის შესახებ

ბეგობის არწივი

            ბეგობის არწივი (ლათ. Aquila heliaca) — მტაცებელი ფრინველი ქორისნაირთა რიგისა. სხეულის საერთო სიგრძე 72–84 სმ აღწევს, ფრთების შლილი 180–215 სმ,  მასა 2,4 კგ-დან 4,5 კგ-მდე.  დედალი მამალზე დიდია. საერთო შეფერილობა მოყავისფრო-შავია. გასდევს მუქი ფერის მრავალი ვიწრო ზოლი, მხრებზე აყრია პატარა თეთრი ლაქები.   გავრცელებულია  ბალკანეთიდან წინა აზიისა და სამხრეთ ციმბირის გავლით მონღოლეთსა და ჩრდილო-დასავლეთ ინდოეთამდე. ბინადრობს სტეპებში, ტყესტეპსა  და   უდაბნოებში. იზამთრებს   სამხრეთში  (აფრიკა, აზია).  ზოგჯერ მომთაბარეობს. უპირატესობას ანიჭებს  მეჩხერ, ფოთლოვან და შერეულ ტყეებს; მთებში ბუდობს ზღვის დონიდან 1400 მეტრამდე. საქართველოში გვხვდება ერთეული წყვილების სახით. ვერტიკალურად აღწევს 2000 მეტრამდე. აღმოსავლეთ საქართველოში მოზამთრე ფრინველია, დასავლეთ საქართველოში — მიმომფრენი. ჩვენში მეტად მცირერიცხოვანია. ბუდეს იკეთებს ხეზე ან ბუჩქზე (1–25 მეტრ სიმაღლეზე), იშვიათად კლდეზე ან მიწაზე, მაღალი ძაბვის გადამცემ ბოძებზეც. მასალად იყენებს ტოტებს. აპრილში დებს 1–4 (ჩვეულებრივ 2–3) თეთრ კვერცხს. დედალ-მამალი კრუხობს 43 დღის მანძილზე. აღსანიშნავია, რომ ჩვეულებრივ, ხმარობენ 2 ბუდეს. 60–77 დღეში მართვეები ბუდეს ტოვებენ. იკვებება მცირე ზომის ძუძუმწოვრებით,  მღრღნელებით. მწერებით. ზოგჯერ ფრინველებით,  ქვეწარმავლებით, თევზით  და მძორითაც.

შეტანილია IUCN-ისა და საქართველოს „წითელ ნუსხებში“.

გაზიარება